Нефть 200 долларт хүрэв

-Нью-Йоркийн түүхий эдийн бирж дээр жилийн эцсийн нийлүүлэлтийн гэрээнд нэг баррель нефтийн үнэ 200 ам.доллараар үнэлэгдсэн байна-

Жилийн эхэнд 100 ам.доллар хүрсэн баррель нефть дэлхийн эдийн засгийн тогтворгүй байдлын элемент хэвээр байсаар байна. Нью-Йоркийн түүхий эд, барааны бирж дээр жилийн эцсээр нийлүүлэгдэх фьючерсийн нефтийн нэг баррелийн үнэ 200 ам.долларт хүрчээ. Нефтийн хэрэглээний өсөлт, Нигери, Пакистан зэрэг бүс нутгийн тогтворгүй байдал болон нефть экспортлогчдийн олборлолтоо багасгасантай үүнийг холбон шинжээчид тайлбарлаж байна.

Өнгөрсөн мягмар гаригт дэлхийд томоохонд орох Нью-Йоркийн бараа-үүхий эдийн бирж дээр 2008 оны сүүлчээр нийлүүлэгдэх Америкийн хөнгөн төрлийн нефтийн олон тооны үнийн гэрээ байгуулагдаж, нэг баррель хөнгөн нефтийн үнэ нь 200 ам.доллар болсон тухай Bloomberg агентлаг дамжууллаа. Энэ их өндөр үнийн гэрээг байгуулахад арилжаачид маш идэвхтэй байсан ба бирж дээр 5533 гэрээ байгуулагдсан нь хоёр сарын өмнөх үзүүлэлтээс 10 дахин их байна. Үнийн огцом өсөлтийг удахгүй нефтийн хангамж хүрэлцээгүй болно, Персийн булангийн орнууд ба Мексикийн булангийн нефтийн нөөц шавхагдаж байгаа гэсэн мэдээлэлтэй холбон тайлбарлаж байна. Тухайлбал, Мексикийн нефтийн монополи Petroleos Mexicanos компани дэлхийд томд орох нефтийн Кантарель ордод олборлолт сүүлийн гурван жилийн дотор 40 хувиар буурсныг мэдээлэв. Нигерийн улс төрийн тогтворгүй байдлын улмаас орон нутгийн нефть олборлолтын хэмжээг 2005 оны арванхоёрдугаар сараас 11 хувиар бууруулж, өдөрт 2,18 сая баррель болгожээ.

Үүнтэй зэрэгцэн Олон улсын эрчим хүчний агентлагийн (IEA) үнэлгээгээр энэ жилийн нефтийн хоногийн хэрэглээ 87,8 сая баррелиар нэмэгдэж байна. Энэ нь өнгөрсөн жилийнхээс 2,1 саяар илүү гэсэн үг юм. Зөвхөн Хятадын эдийн засгийн өдрийн хэрэглээ нь 5,7 хувь буюу найман сая баррель болох юм. Нефтийн үнийн хөөрөгдлийг Нигериэс ирж буй түгшүүрт мэдээнүүд улам гааруулж байгаа юм.

Нигерийн өмнөд хэсгийн нефтийн ордуудад довтлохоор тэндхийн бүлэглэлүүд ихээхэн хэмжээний зэр зэвсэг хуримтлуулж байгаа тухай Reuters агентлаг мягмар гаригт мэдээлж байлаа. Энэ мэдээнд үндэстэн хоорондын нефтийн компаниудын аюулгүй байдлын зөвлөхүүд Голын

мужийн нийслэл Порт-Харкортын ойролцоо довтолгоо болно гээд няцаахад бэлтгэж эхэлснийг дурджээ. Нигерийн Голын мужид тус орны томоохонд тооцогдох нефть, байгалийн хийн экспортын цогцолбор мөн хэдэн арван нефтийн ордууд ба дамжуулах хоолойнууд байдаг.

Дашрамд дурдахад энэ сарын 3-ны өдөр Америкийн хөнгөн нефть гэх Ligth Sweet Crude маркийн нефтийн хоёрдугаар сарын нийлүүлэлтийн фьючерсийн үнэ 100 ам.доллар гэсэн сэтгэл зүйн хэмжээг алхсан билээ. Дараагийн өдөр нь ОПЕК-ийн ерөнхий нарийн бичгийн даргын үүрэг гүйцэтгэгч Майзар Рахман (Индонезийн) мэдэгдэхдээ хэрэв нефтийн эрэлт хангалтгүй гэх асуудал үүсвэл ирэх сарын 1-нд Вена хотноо болох тус байгууллагын уулзалтаар олборлолтыг ихэсгэх талаар ярилцаж болох юм гэсэн билээ. ОПЕК-ийн Ерөнхийлөгч Шакиб Хелилягийн үзэж байгаагаар 2008 оны эхний улиралд нефтийн үнэ өсөх болно. Эрчим хүчний гол түлшний үнийн итгэлтэй өсөлтийг “Пакистаны улс төрийн хурцатмал байдал, Нигери дэх хүчирхийллийн даамжрал ба АНУ-ын нефтийн нөөцийн бууралт” гэж тэрбээр тайлбарласан байна.

Нью-Йоркийн бараа, түүхий эдийн биржийн мягмар гаригийн арилжаан дээр бага хүхэрлэгтэй хөнгөн түүхий нефтийн хоёрдугаар сарын нийлүүлэлтийн гэрээний нэг баррелийн үнэ 1,24 ам.доллар буюу 1,3 хувиар өсч 96,33 ам.доллар болсон байлаа. Лхагва гаригт АНУ-ын Эрчим хүчний яамны нефтийн нөөцийн тухай долоо хоногийн тайлан гарчээ. Түүнд түүхий нефтийн нөөцийн ээлжит бууралтын талаар өгүүлэгдэнэ хэмээн хүлээгдэж байна. Одоо АНУ-ын түүхий нефтийн нөөц сүүлийн гурван жилийн дотор хамгийн доод хэмжээнд байгаа юм.

From:

http://www.news.mn/news?section=news&page=show&content=news&id=6007